Akan So Book 1 Complete Hausa

Ta juya, ta sauke idanunta kan Nana, wadda ta kira da sunanta cikin yanayin tambaya da shakku.

Ta kura mata ido sosai. Ita ma tana sanye da wandon jeans shuɗi da riga mai launin shuɗi mai haske. An rufe kanta da hula wadda ta ɓoye sumar kanta da aka aske gaba ɗaya.

Duk da tsananin rama da ta yi, hakan bai hana kyawunta na halitta bayyana ba. Hawaye sun cika idanunta, har suka fara zuba a kan kumatunta.

Nan take, Sofi ta ji kamar zuciyarta ta tarwatse. Ta miƙa hannunta zuwa ga Nana, alamar tana son ta zo kusa da ita.

A hankali Nana ta ƙaraso, ta riƙe hannunta, sannan ta zauna kusa da ita.

“Nana, za ki ɓata kayan jikinki fa. Tashi ki gani, ga inda na zubar da kofi ɗin nan.”

Kamar ma ba ta ji abin da Sofi ta faɗa ba, Nana ta ƙara damƙe hannunta sosai.

“Mummy, don Allah ki yafe mini. Ganinsa kawai nake so, ko sau ɗaya ne.”

Sofi ta ja dogon numfashi, tana ƙoƙarin danne hawayen da ke kwarara a fuskarta.

Ta ina ma za ta fara gaya wa Nana cewa tun bayan watanni biyu da haihuwarta, ta yi ta neman Moh, amma duk a banza?

Daga ƙarshe ta gaji, ta fid da rai, ta daina nema. Yanzu kuma wannan shi ne fata na ƙarshe da take da shi dangane da samun sauƙin Nana.

Ba ta san a wane ɓangare na duniya yake ba, balle ta san inda za ta fara neman sa. Haka kuma, ba ta san yadda za ta fara bayyana wa Nana wannan gaskiyar ba.

“Nana, ba na so ki ɗaga hankalinki da yawan fata cewa za a same shi. Kada daga baya idan ba a same shi ba, abin ya karya miki zuciya.”

Nana ta share hawayenta, sannan ta yi murmushin nan nata mai ɗaukar hankalin duk wanda ya gani.

“Ko da ba a same shi ba, aƙalla ba zan ji kamar ban yi ƙoƙarin neman sa ba.”

Sofi ta mayar mata da murmushi, sannan ta ce,

“Abin da kawai ba na so shi ne ki yi ta ɗora kanki kan samun sa har fiye da kima. Yanzu dai tashi daga inda kika zauna a kan kofi ɗin nan. Je ki canza kaya, sannan ki kwanta ki yi barci.”

Ba tare da ta yi wata gardama ba, Nana ta miƙe tsaye. Ta matso kusa da Sofi sosai, ta sumbace ta a kumatu, sannan ta ce,

“Ina sonki, Mummy.”

Sofi ta mayar mata da sumbar, ta ce,

“Ni ma ina sonki, gimbiya ta. To, je ki da sauri.”

A dai-dai lokacin da Nana za ta fice daga ɗakin girkin, sai Sofi ta kira ta da ta dawo.

“Yaya aka yi har kika kai wannan saƙon gidan talabijin?”

Nana ta yi ɗan murmushi, sannan ta ce,

“Mummy, a zahiri, ni da Fa’iza ne muke hira a makaranta, sai ta ce min ya kamata mu je gidan rediyo, inda ake sanar da neman mutanen da suka ɓace.

Sai na rubuta saƙon a takarda. Da aka tashi daga makaranta, ba mu tsaya yin darasi ba, kai tsaye muka tafi.

Da farko ma ba su bari mu shiga ba. Sai da na fara kuka, sannan wani mutum ya zo kusa da mu ya tambayi abin da ya faru. Na gaya masa cewa ina neman mahaifina ne, kuma ina cikin tsananin baƙin ciki.

Ganinsa kawai nake so. Sai mutumin ya shigar da mu kai tsaye cikin gidan rediyon, ya biya kuɗin da ake buƙata, sannan muka miƙa wasiƙar.

Wallahi, Mummy, ban gaya musu su saka shi a talabijin ba!”

Tun daga lokacin da Nana ta fara bayani, Sofi ta tsaya tana kallonta kawai. Ta rasa abin da za ta ce, don haka sai ta ɗan gyada kai kawai.

Ta ci gaba da kallon Nana har sai da ta fita daga ɗakin girkin. A lokacin ne hawayen da ta daɗe tana dannewa suka ƙwace mata, suka fara zuba ba tare da ta iya hana su ba.

Muryar Fu’ad ta sake ratsawa cikin kunnuwanta, kamar dai yanzu-yanzu ya faɗi maganganun a gabanta:

“Ni ba irin mutanen da suke rayuwa cikin farin ciki har abada ba ne. Tun ranar da kika amince da soyayyata, ya kamata ki san cewa ni ba irin mutumin da zai riƙa zagayawa da yara da zanen goyo ba ne.

Ni ba mutumin da zai ɓata lokacinsa da nuna ƙauna ga yara ba ne. Ina da Haneef. Ina da Fa’iza. Duk lokacin da na ji ina son ganin yara, kawai zan je gidansu in ga na su.”

Sofi ta miƙe tsaye, ta ɗauki wayarta, sannan ta kira Ansar kafin tunaninta su ƙara rinjayar ta. Wayar ta yi ƙara sau ɗaya kacal, sai ya ɗaga.

Sauke Littafin Akan So Book 1 Complete Hausa Novel

Danna maballin da ke ƙasa domin sauke littafin daga Google Drive:

📥 DOWNLOAD